亞視冇得續牌消息轟動全港，網民「食花生」邀小鳳姐助興之際，亞視執行董事葉家寶就好惆悵，佢噚日傍晚接受《壹錘定音》節目訪問時顯得心事重重，但有一位意外訪客令葉家寶重現笑容。探班神秘嘉賓就係《蘋果日報》社長葉一堅。唔講唔知，堅哥原來係葉家寶嘅堂阿哥，兩人握手傾閒偈，令現場氣氛輕鬆唔少。
葉家寶話二人投身傳媒界，事隔多年重逢好開心。佢細個時不時見到堅哥，但後來堅哥去台灣主理台灣《蘋果》，佢就喺亞視工作，雙方就冇見過面喇。八方好奇問葉家寶仲有冇邊位親戚係傳媒界高層？葉家寶話唔多記得。八方問過堅哥，佢話如果以輩份計，葉家寶其實係佢阿叔喎。