亞視呢一場鬧劇，外人睇就係花生，但實際上根本就係一場悲劇。正所謂爛船都有三分釘，亞視話晒都係香港第一個電視台，就算點hea都唔應該落得如斯田地。今時今日，亞視去到就執笠嘅地步，講到尾都係王征管理不善，且仲要亂嚟。上次誤傳江澤民死訊大家仲記憶猶新，今次又誤導公眾落實賣盤畀王維基。呢兩單嘢，都足以證明王征充滿土豪式思維，即係以為間公司係我嘅，我想點就點，而亞視新聞嘅公信力，亦因此俾佢累到冇乜得剩。
唔少內地富豪對傳媒業有情義結，撇除商業因素，有面都係好重要。殼價節節上升，中國人嘅虛榮心多多少少都有影響。
阿爺前晚公佈放寬對險企投資嘅限制，容許佢哋投資香港創業板股份。過去參與GEM仔嘅都係散戶，有參與嘅基金就極少，呢個消息對GEM仔有利，或會吸引基金買入一啲高質創板股份轉主板。與此同時，會令創業板以至主板殼價水漲船高！
噚日唔少創板股份炒上去，浙大蘭德（8106）、神州數字（8255）呢兩隻科網股雙雙飛升。環觀8字頭科網股，龍傑智能卡（8210）最值博。原本創板值三億，主板值五億，早前龍傑宣佈由創板升呢上主板，而家先啱啱4.2億元，主板價都未到。當神州數字已到9億元，準主板股龍傑冇理由只值而家呢個價。
Fifi
http://www.facebook.com/lovefrystock
本欄逢周二、四刊出