【本報訊】香港電視娛樂獲批12年免費娛樂電視牌，與其名稱只差兩個字的香港電視網絡（HKTV），其前藝人陸駿光、黃美棋直言差點「中伏」，陸昨日在電話笑說：「仲以為係港視獲12年免費牌，好興奮，點知原來搞錯。可能王生（王維基）玩得啩，愚人節咪玩吓佢囉。」美棋說：「好混淆，我上網搜尋，再等字幕出，知唔係都失望。」黃芷晴則說：「我有啲朋友都誤會咗，多一個平台係好事。」
早對亞視新聞有保留的王宗堯說：「有啲預期之內，搬龍門搬得太犀利，王生攞牌係有難度。基本上之前已經講咗nowTV同奇妙電視都有，唔係好明之前嗰個攞嚟做乜？好似好多不明文規定。」《導火新聞線》雖贏盡口碑，但最終仍無緣在免費電視台播放，周家怡和梁小冰昨出席活動時坦言感失望，家怡說：「少少唔開心，希望王生申請政府會批，亞視嬲都冇辦法，只係怕員工冇糧出。」小冰說：「順應民意，廣大巿民都忍咗好耐，亞視好多年冇製作，浪費人才，等如廢嘅電視台。」
劉玉翠：刺激整個行業
艾威則說：「早幾日有同佢（王維基）WhatsApp，冇話擺唔擺上枱，對佢冇影響，仲幫咗佢股票升一升。反而擔心亞視員工，講明唔續牌，錢係明蝕。」曾為爭取港視發牌喊到聲嘶力竭的「西貢師奶」劉玉翠希望獲發牌的電視台增加製作，她說：「我係中立，希望畀多啲呢行嘅人出路，刺激番成個行業。」
■記者周鳳儀、黃曉妍、楊潔雯