新世界發展（017）創辦人鄭裕彤（彤叔）自從2012年9月入院之後，一直未有再露面，佢有份嘅老牌上市公司萬邦投資（158）噚日忽然宣佈，彤叔因為「健康情況」而辭去執行董事與主席職位。
萬邦呢個通告一度令人擔心彤叔嘅健康情況轉差，新世界發言人就回應話，彤叔冇事，一切安好。
查實彤叔三年前已經辭去新世界系內上市公司嘅董事職務，將上市王國交晒畀阿仔鄭家純，89歲嘅彤叔𠵱家辭埋萬邦主席之後，只係擔任利福（1212）與信德（242）非執董。
至於萬邦主席一職，就交由年紀仲大過彤叔嘅大股東鍾明輝，94歲嘅鍾明輝雖然年紀大，但係近年出席萬邦股東會依然係頭腦清晰，身體唔錯。鍾明輝與彤叔一齊創辦萬邦，1967年年底就出席董事了。