今年香港嘅愚人節提早咗一日舉行，亞視新聞部前日喺6點鐘新聞送大禮「娛」人，無端端「老屈」港視主席王維基做咗白武士，話已經賣咗亞視畀魔童，直至噚日新聞部阿頭劉瀾昌先澄清只係單方面消息啫，笑大人個口。有網民好眼利，發現亞視兩次亂報新聞，都係由同一位陳生、即係新聞及公共事務部助理副總裁陳興昌負責，網友個個變晒《家有囍事》吳君如，大叫：「乜又係你呀？陳生。」
網民：陰功豬
亞視最經典嘅誤報，梗係2011年7月喺6點同夜間新聞，報道前總書記江澤民病逝消息，當時仲將台徽轉為灰白色，以示哀悼。點知唔夠24小時，亞視就撤回新聞兼道歉，當時有傳係江澤民親戚、即係王征「指示」新聞部報道，而當日負責呢個報道嘅主播，就係陳興昌。
老夫子都教識大家啦，有啲嘢叫做禍不單行。事隔4年，估唔到陳生再被王征跣鑊甘，前日6點鐘新聞，再次由陳興昌「搶聞」報道魔童買亞視呢單「新聞」。唔少網民睇完都戥陳生唔抵，大嘆佢中伏陰功豬。八方至此只諗起，張家輝都講過啦：「仆你個街！亞視嚟嘅喂！」世事無奇不有，特別係喺王征治下嘅亞視，不過如斯騎呢情節，隨住行會話要釘亞視牌，可能暫時告一段落咯。
李八方
mailto:[email protected]