呢幾日嘅特區政府，為咗亞視身心俱疲，由於主理廣播政策嘅係商務及經濟發展局局長蘇錦樑，所以佢一定要坐鎮香江。八方聽聞，特區政府係喺上星期先決定，要喺噚日、即係4月1日愚人節開特別行會討論亞視續牌問題，而早喺特區政府有此決定前，原來蘇錦樑已經同屋企人訂咗機票，準備3月31日出發去泰國，過一個熱辣辣嘅復活節假期。
政府最終嘅決定打亂咗蘇錦樑嘅放假行程，而大家噚日見到蘇錦樑坐定定主持記者會，就知道佢為咗收拾亞視殘局、放棄咗去泰國happy，之但係佢嘅太太同屋企人呢，就丟低佢如期喺前日上飛機咯，換言之亞視令到蘇錦樑呢個復活節，要孤伶伶一條友度過。