噚日係四月一日愚人節，每逢呢個節日，假新聞假消息層出不窮，唔check真啲真係會雙目失明，好似喺香港啲電視台邊間有免費牌單料，成為愚人節城中最大笑話。喺世界球壇，都一樣充斥住呢啲疑幻疑真嘅消息。
英國《每日星報》喺愚人節前刊出一張自稱係獨家披露嘅相，相中人係曼聯球星朗尼，而佢個右上臂有個新紋身，係利物浦嘅隊徽，除咗有紅軍隻吉祥物利物鳥之外，下面仲隱約見到「YNWA」嘅標誌。
《每日星報》就話呢張相係英格蘭備戰意大利場友賽時，喺都靈影到嘅，之後就解釋紋身嘅由來，話說十日前，朗尼同一班老友Side Bet，話自己一定會喺作客利物浦場英超入波，否則就會將紅軍嘅隊徽紋上身，點知佢唔單止冇波入，仲要喺尾段射失埋12碼，結果佢願賭服輸，將紅軍個隊徽紋咗喺右上臂，而自己喺呢段期間，無論練波或比賽都着長袖，慎防俾傳媒影到，仲話約咗個師傅喺稍後時間做激光去除佢，但點知都係百密一疏，俾《每日星報》影到。
睇落似層層咁，但我求大俠就覺得既然咁唔見得光，點解影呢張相時，朗尼完全無遮無掩，仲要戴住個黑超好似度假咁款嘅？張相似係做咗手腳多，試問一個死忠愛華頓球迷兼係曼聯球員，玩到咁大，唔驚畀啲球迷鬧爆？有外國網民已留言話「April Fool」，係真係假，球迷心中有數喇。
飛人入「魔」太流
噚日除咗《每日星報》，《每日鏡報》亦玩埋一份，話足總考慮喺下屆英聯盃，喺角球旗位置增設自拍站，提供埋自拍神器畀班球員可以攞住自拍；而阿仙奴官網，就宣佈話推出左腳專用波，奧斯爾等球員試完後仲大讚好，我求大俠真係想睇睇呢個左腳專用波有咩唔同。至於飛人保特話簽約曼聯呢啲，就真係太流，我哋香港都有網民惡搞陳七以天價一億鎊加盟巴塞喇！講到創意，我都係鍾意當年歐偉倫加盟曼聯嗰單，夠搞笑！
識睇，一定係睇足英台【英波Live】：
http://soccer.appledaily.com
http://bit.ly/engballlive