接到中文大學新亞書院通知，新亞生物系最著名嘅校友徐立之（1972），前香港大學校長，現新亞書院校董，將會演講三場，詳情如下：
第一講：「成功之道乃天地人」，在四月十日星期五上午十一時半於中大逸夫堂舉行。
第二講：「走在生物醫學科的前沿」（Working in the Frontiers of Biomedical Research英語演講），在四月十日星期五下午四時正於中大蒙民偉樓七樓二號演講廳舉行。
第三講：「基因與健康」，在四月十一日星期六下午四時於尖沙嘴科學館舉行。
點解徐立之會在兩日內講三場呢？主要原因就係徐立之自己有非常緊湊嘅工作及外訪時間表，本來唔想講，唔會講嘅，但母校為生物系創始人任國榮教授辦一個「任國榮先生生命科學講座」，書院認為第一屆講座之最佳人選就係任先生之學生、世界基因研究權威徐立之，徐立之知道之後，當然義不容辭，真真正正百忙之中，偷出兩日，一口氣作三場演講紀念先師，報答師恩。
新亞書院生物系在一九六四年有第一屆畢業生，農圃道時期（1972年遷入沙田，任國榮先生年達65歲退休），人才輩出，知名大教授校友就有徐立之、辛世文（1966，現中大善衡書院院長）、姚大衞（1969，中大解剖學教授，已退休），胡紹燊（1971，香港大學教授），方宏勳（1968）、黃銘洪（1968，浸會大學教授），以上只係左丁山識得嘅幾位，其他在海外揚名嘅，聽講還有不少農圃道時期新亞生物系畢業生有近半數人得海外大學博士學位，於此可見任國榮先生教學期間，生物系學風嚴謹，眾弟子畢業後到外國深造，教研成績出眾。任先生對學生好嚴格，不准系內學生參加新亞學院橋牌賽，有一年新亞系際橋牌賽冠軍係××系，所向無敵，新聞系系主任/橋牌發燒友魏大公先生猛問××系是甚麼，同學皆知道××系就係邊一個學系，只能會心微笑。
任國榮先生子女為紀念父親，在千金任啟明醫生推動下，去年慷慨捐贈169萬餘元，成立「任國榮先生生命科學講座」，請新亞書院主辦，信廣來院長當然應允，信院長離港返美國後，重為馮婦嘅黃乃正院長，係中大理學院院長，立即跟進，力邀徐立之為第一屆演講人，以示新亞承傳之道，徐亦欣然復出，為自港大校長職位退下後，作第一次公開演講，歡迎各界聽講，免費入座，不少農圃道時期嘅新亞生物系校友聞訊，反應熱烈，希望各校友踴躍參加。