創科及科技局夭折，梁特另起爐灶成立嘅創新及科技諮詢委員會，成員名單噚日公佈，主席由做唔成局長嘅行政長官創新及科技顧問楊偉雄出任，委員中有兩名科大畢業80後，一個係獲科大破格取錄嘅「星之子」陳易希，另一個係研發航拍機、市場佔有率七成嘅大疆創新創辦人汪滔。
陳易希同八方講，話早幾日有政府官員打嚟問佢想唔想入會，佢即刻答應，話想獻計點幫年輕人搞科技，「想鼓勵年輕人憑科技向上流動」。佢畢業後同朋友開公司開發程式，每年營業額有七位數字，但至今都買唔起樓。佢話支持成立創科局，相信係政治因素先唔獲立法會批准。
委員會中同時有7名大學高層，包括科大校長陳繁昌、中大校長沈祖堯及理大校長唐偉章。仲有新民黨葉劉淑儀同民建聯葛珮帆，名單中竟然冇資訊科技界議員莫乃光，白鴿黨涂謹申為莫抱不平，話顯示政府任人唯親。