市場波譎雲詭，呢一分鐘話有交易，下一分鐘就可以無咗。講緊嘅唔喺亞視，而係幾年前甚為「當炒」、高調到曾在香港賣過電視廣告的光滙石油（933）。光滙背景神秘，老闆薛光林做石油倉儲貿易起家，在向來被國企壟斷的石油系中，成功取得一張海上供油牌照，是唯一獲發牌民企；後來因「炒油」虧損業績走樣，一度沉寂。
光滙昨自爆配股失敗，話前日收市後曾進行配股，雖反應好好仲超購，但光滙話「諗過度過」都係覺得個分配比例「不能更有效推動公司各方面的戰略發展」，所以決定終止單deal喎。Call晒客收齊飛先話唔做，玩咩？有基金界朋友直言呢個解釋係「bullshit」，話理解唔到民企老闆思維。
據銷售文件顯示，光滙配股基本規模約7.8億元，另有upsize option可加碼至11.65億元。這宗蚊型交易竟至少有五間投行參與，仲一度有人「彈弓手」，拖到下午六時才去馬。口痕友說，其實單deal八時已足額認購，但投行卻對外解釋，指由於光滙老闆堅持要行使upsize option，最後搞到唔夠飛，交易才拉倒。加碼唔成，情願所有錢都唔要，咩邏輯？
傳聞這宗1億美金配售，約8,000萬元認購額是來自1張大飛，餘下2,000萬元才是散客，對沖基金居多。神秘大飛究竟是何方神聖？或者這才是公司堅持加碼、搞唔掂就情願一拍兩散關鍵。
海迪