投資者幾時都鍾意低息環境多啲，股神畢菲特都唔例外。聯儲局主席耶倫早排放風話今年可能開始加息，股神近日出席一個汽車業論壇就出口術，伺機叫耶倫唔好咁做，指𠵱家所有情況都幾好，如果佢做聯儲局主席就唔會加息咁話。
股神認為，𠵱家美國經濟穩定，如果聯儲局大幅加息反而會搞亂檔，所以如果係由佢話事，就唔會加息嘞。不過，股神大把錢，投資又睇長線，即使美國忽然加息，都未必對佢帶來實際影響。佢都話：「就算（聯儲局主席）耶倫偷偷話我知，未來兩年有乜行動，對我哋做嘅嘢都冇乜唔同。」
股神旗下巴郡持有通用汽車與多間汽車代理商，俾人問佢點睇提供一條龍服務嘅電動車公司Tesla，佢老人家就認為，Tesla唔會威脅到傳統汽車代理。