愚人節嘅一朝早，全城熱論亞視到底會執笠定浴火重生？行會傍晚公佈釘牌決定前，市民對其他新聞都唔太關心，就連原定噚日朝早出席商台節目講吓香港加入亞投行嘅商務及經濟發局前局長馬時亨，亦由重點講亞投行變咗講亞視風波。咁又係嘅，肥馬以前話晒主管商務局；廣播事務呢啲嘢，佢確實有江湖地位評論，唔怪得主持人陳志雲唔放過問呢位識途老馬嘅意見；可能覺得志雲大師好識貨，肥馬在節目期間講到手指指好興奮。
點評亞視外，都要講返亞投行嘅，佢話好支持香港加入，事關自從內地經濟環境轉好，香港地位已經被矮化，一定要參與國際機構保持競爭力，仲同CY一樣呼籲議員唔好拉布阻撓。