噚日6點半鐘嘅時候，好多市民坐定定，等睇政府記者會直播，好想知道亞視係生定係死。而商務及經濟發展局局長蘇錦樑喺開場白講咗幾句後，八方身邊嘅同事發出嘩嘩聲，話估唔到港視有牌。吓！特區政府轉性賣大包？過咗幾分鐘後先發現，原來蘇錦樑話「香港電視娛樂」獲發免費電視牌照，好多人誤以為係港視，結果空歡喜一場。
原來唔止八方同事中伏，就連同「香港電視娛樂」一樣、屬小小超擁有嘅《信報》，佢哋亦立即報道「香港電視獲發牌」，仲貼埋魔童張相（圖），後來發現一場誤會，新聞就下架。有網民好關心處理呢段新聞嘅記者有乜下場？希望小小超「刀下留人」。