立法會用咗成廿萬聘請顧問就立法會保安及管理作檢討，建議保安要設唔同顏色警示、增加圍欄等，而喺黃色警示下，所有訪客包括記者都要接受安全檢查。建議一出，記者呱呱嘈，覺得阻礙採訪，最怕檢得嚟可能會錯過重要嘅新聞場面。有議員就同花生友講，其實當中有啲措施，對議員助理甚至議員都有影響，覺得啲措施都係雙面刃，有辣有唔辣。
其實立法會呢份保安報告出爐之前，秘書處已經做咗措施加強保安，包括職員證只可出入所屬議員樓層，去第二層交收文件都要搵人開門，議員助理已經狂呻唔方便；日後若然再收緊，議員助理喺緊急關頭出入立法會，同樣要show證，一樣麻煩多多。
傳葉劉申請40張職員證
而顧問報告另外一項建議，係將議員申請職員通行證數目設限。根據立法會文件，議員申請職員證數目普遍介乎6至15張，不過有一個議員申請嘅職員數目為36至40張，花生友聽聞係新民黨主席葉劉淑儀。有泛民議員私下笑言，建制派成日批評泛民亂帶人入立法會，原來最「善用」立法會資源嘅另有其人。
花生友唔知，有冇建制議員反對新保安安排，只知立法會秘書長收集全體議員意見後，就會提交行管會討論，料行管會本月再開會作決定。
花生友