有馬壇神童之稱嘅華將蔡明紹，上周三沙田夜賽期間受傷，右手尾指骨裂，要退下火線，尾場「優勝」改配何澤堯。自此蔡明紹一直復出無期，亦冇操馬，不過紹仔這天(1日)近收操時突然露面，返馬房找師傅告東尼傾談，約半小時後離開。紹仔透露傷勢絕非嚴重，可是仍感到酸痛，醫生建議佢要休息多5個星期，待裂骨部位癒合，不過紹仔覺得自己情況尚好，周四(2日)將前往覆診檢查傷勢，睇睇有冇可能早啲恢復操馬。
現年24歲嘅蔡明紹成名甚早，2011年以20歲之齡，策灰馬「加州萬里」奪香港盃，係首位喺香港勝出國際一級賽嘅華人騎師，翌年夥拍同一匹馬，成功衛冕這項大賽。而同喺2012年，蔡明紹征戰英國識價盃騎師邀請賽，結果憑一冠三亞佳績，協助世界騎師隊成為總冠軍，個人更勇奪最高榮譽銀馬鞍獎。
不過自從紹仔結婚生女，以及雷神等頂級好手來港爭食後，上季起紹仔成績大跌watt，由前季有57win排第三，跌至今季暫只得15win跌出十大，季內平均每個月獎金收入約23萬，比高峰期超過60萬低一大截。