人稱「肥胡」嘅醫管局前主席胡定旭果然係夠份量，「殼后」朱李月華（朱太）旗下先施錶行（444）上星期五晚宣佈，搵佢做聯席主席，兼且一齊發展海南博鰲國際醫療旅遊項目。先施錶行呢個星期一復牌後，股價好似火箭咁連升三日，噚日收報1.69元，較上周五嘅累計升幅達1.2倍，公司市值多咗32億元，去到58億元，所以肥胡真係夠份量。
肥胡除咗帶挈先施錶行嘅股價升超過一倍，佢本人亦都肥過肥仔水，事關佢加入先施錶行後，獲發1.38億份先施錶行嘅購股權，每股行使價只係0.61元，按先施錶行噚日收市價計算，如果肥胡行使購股權，隨即沽貨嘅話，已經賺近兩倍，雖然實際上佢係要分批行使，但心理上應該已經高興到飛起。