一連五日的復活節加清明節假期，明日開始。近日內地利好政策浪接浪，繼基金可南下自由行掃貨、一帶一路願景與行動出台、二套房首期獲下調令樓市鬆綁後，最新係保險資金可投資香港創業板。不過，港股向來要睇兩邊面色，美國本周有多個重要數據公佈，今日係貿易收支、工廠定單，明日輪到失業率，唔好咁快就holiday mood。
港股已連升三日，兼且周一、二成交額都超過千四億元，昨日就千一億元。現時市況幾似舊年12月，當時恒指升破24000關，連日成交額破千億元，其中兩日亦超過千四億元；今次恒指升破25000關，相對成交唔算太大，若後市成交不繼，或難再推升恒指，今日正值長假前夕，成交可能再縮。睇走勢圖，恒指呈身懷六甲，後巿回吐機會大。
自從總理李克強拋出「互聯網+」後，我就開始尋寶，近日睇中天鴿互動（1980）。天鴿主要於內地經營實時社交視頻平台、手機遊戲、網絡遊戲及網上購物等業務；又結合線上線下開拓O2O業務，如夥拍卡拉OK，讓客戶唱K時，可與社交視頻平台的在線用戶作實時互動及遊戲。現時主要收入來自實時社交視頻平台，包括9158.com及Sina Show。
天鴿剛於周一派成績表，2014年埋單蝕1.08億元人民幣，撇除一次性開支及優先股公平值變動，經調整則賺2.67億元人民幣，按年增29.6%。咁即係業績唔係表面睇咁差，虧損主要係優先股公平值變動所致，屬非現金的數字遊戲；核心的社交視頻及手遊，因有主要股東新浪網支持，盈利持續增長。由於早前已派特別股息，今次冇派末期息，係預料之內。
等候回吐小注買入
據主席傅政軍講，有內地A股老闆邀請回歸A股，因公司股價在港被低估，轉到內地上市可反映公司價值；更指若情況持續，會有股東壓力，目前仍在商討。至於手遊、醫療及電商業務，會參考金山軟件（3888）或網龍（777）等科網公司的控股做法，條件成熟時不排除分拆。
天鴿係視頻社交網龍頭，賺錢模式獨特，市場仍在擴展，幻想空間無限。不過，呢類業務及定位獨特的網股，只宜小注怡情，以免當局整頓，後果堪虞。天鴿本周已連升三日，昨收報4.89元，由3月20日低位3.07元計，八個交易日已彈升近六成。策略上，等候回吐小注買入，首個目標5.28元招股價，中長線睇舊年8月高位6.25元。
割柑人
本欄逢周四刊登