NBA頂級控衞正面交鋒！史堤芬居里（Stephen Curry）周二帶領聯盟一哥勇士，出戰由基斯保羅（Chris Paul、CP3）領軍嘅快艇，勇士以110:106贏波錄十連勝。兩大控衞同得27分，但居里有次進攻搞到CP3尷尬倒地睇住佢入波，個人比拼起碼都贏點數啦。
勇士喺賽前已經穩奪西岸冠軍，不過話晒佢哋喺上屆季後賽首圈就係畀快艇淘汰，周二再對壘一於唔留手，務求盡快鎖定埋常規賽冠軍。日前《ESPN》做咗個NBA控衞排名，CP3力壓居里排第一，雖然佢喺今場波都攻入27分兼有九次助攻，但佢都係俾居里搶晒鏡。
最精采嘅鏡頭出現喺完第二節前，居里帶波去到籃底，見到CP3上前防守佢嘅時候，突然嚟個後手crossover，扮轉身上籃其實係踏返出去跳投得手，俾居里呃晒嘅CP3就跣咗落地，搞到後備席嘅勇士球員見到呢球「年度插花」都興奮到彈晒起身。快艇今場波有比歷克格芬（Blake Griffin）入全場最高嘅40分但都冇用，最後都係輸波。
居里亦創造咗一個新NBA紀錄，佢喺今場波三分球六射四中，今季入三分波總數已經有251球，連續三季都入至少250球三分波。