王征亂港，搞到大家心情都down晒，幸好復活節假快到，有啲朋友都會去旅行開心吓。
噚日同國泰航空高層傾偈，知道佢哋年底會推自選點餐服務，例如經濟艙乘客都可以「越級」點餐。𠵱家乘客已經可以登機前選擇飛機餐（圖）要食素、食海鮮或者唔食豬肉之類，但都只限於同一機艙等級，將來就可以升級，例如經濟艙乘客網上check-in時，可以喺商務飛機餐menu訂餐，當然要另外畀錢啦。價錢等國泰話暫未有詳情。
有得揀先至係老闆，經濟艙座位餐枱咁細，商務艙餐份量比較大，擺唔擺得落㗎。同事阿敏就發揮港女精神，「唓！我不如瘋狂點杯麵，又唔使錢」。
講開又講，剛過去嘅七人欖球賽，國泰空姐都有份拍廣告，吸引唔少毒男、宅男share。不過，絲打質疑國泰唔搵空少、男機師拍吓廣告。
#空少害羞不拍廣告
原來國泰拍廣告前會喺公司內部招募，據知每次空姐反應都好踴躍。國泰話佢哋有gym㗎，男同事都操到幾fit，只不過公司男職員較少，而且怕羞啲，冇乜主動報名。國泰如果想吸引阿敏呢類顧客，睇怕要叫啲男同事勇敢啲囉。
費清 ＃要生計，也要生活 ＃毋忘初衷