【亞視玩完 由盛轉衰】
【本報訊】於1957年成立的亞洲電視，服務香港觀眾超過半世紀，是香港第一家電視台，可惜在老闆王征掌管下，逐步走向末路。行政會議昨日決定亞視不獲續牌，對於普遍市民來說，可能是天大喜訊，但對於曾經是亞視三朝元老的徐小明，卻是悲傷時刻。他昨日接受本報電話訪問時，心情十分低落：「非常可惜，呢個電視台我19歲就入去做，經歷過大起大落……特別難過，因為呢個台陪住我長大。」
記者：王麗春
在亞視效力18年的徐小明，先後炮製過《大俠霍元甲》、《陳真》和《大地恩情》等劇集，而《大地恩情》更令無綫同期播映劇集《輪流傳》腰斬；後來做亞視監製時，一手購入《還珠格格》和《雍正皇朝》等受歡迎的內地劇集對撼無綫，一度令敵台陣腳大亂。
懷念昔日良性競爭
徐小明對昔日苦樂仍然記憶猶新：「嗰時苦樂係同觀眾一齊享受，觀眾話節目好，我哋就會好開心。同無綫競爭嗰段時間，亦係大家最享受，儘管有時輸、有時贏，但嗰時係良性競爭。無綫贏，我哋會向對手致敬。」他慨嘆時移世易，近年無綫一台獨大，亞視卻一直處於低沉狀態，輝煌過去只能成為回憶：「我哋係營運同管理，體會會比觀眾更加深，亦比佢哋更加難過。」
亞視在過去日子，製作過無數膾炙人口的劇集，盛載着幾代港人的回憶，徐小明最擔心這些珍貴片段要拍賣來償還債務：「可能公司會當啲片係僅餘資產，會去拍賣還債都唔定，存倉幾十年嘅作品，都可能會煙消雲散。」亞視苟延殘喘多年，終於走到末路，問徐小明可覺得這是一種解脫，他回應說：「都唔排除嘅，熬咗咁耐，可能要有一個終結，不過呢個終結比較殘忍啲。個人嚟講，我係唔想見到呢個終結。」
至於當日為麗的電視編寫過多齣經典長劇包括《鱷魚淚》、《浮生六劫》和《天蠶變》的蕭若元，對亞視這結局不感意外，認為對方沒有履行免費電視牌照，被吊銷牌照理所當然。他昨日在電話中說：「冇辦法唔執笠啦呢啲電視台……每日都蝕緊錢，每日都爭多啲員工錢，成件事好唔合理。」
蕭若元：最好今晚執
他建議亞視長痛不如短痛，應即時作出果斷決定，宣佈立即停台：「最合理就今晚午夜執笠！」
蕭若元認為整件事上，王征是罪魁禍首，因行會已經給予充足時間給他找買家，以及作出一個拯救亞視的方案，可惜他多番錯失良機：「呢個結局完全係王征整番嚟……其實買家𠵱家擺喺度幾個月，你硬係唔賣，係要扭多啲錢，結果就斗零都冇！我係唔明點解有人會蠢到咁，當行政會議deadline係死嘅。」問到蕭若元可有感到欷歔，他坦言沒有：「冇乜所謂，亞視同以前嘅麗的有乜嘢關係吖？」不過他亦十分同情一班亞視員工：「失業嘛……我諗now TV同Cable都會請番啲人，其實電視行業用嘅人會多咗。」
