潘頓禮拜日憑「友瑩格」揚威日本高松宮紀念賽，載譽歸來呢晚即於谷戰贏馬賀喜，第三場四班一哩，佢接手沈廐「金滙龍華」，3倍大熱門無驚無險順利掄元。
深圳龍華鎮首富、百億富豪謝國輝名下之「金滙龍華」，上仗用楊明綸影輸畀「金叻星」做二奶，呢次楊明綸停賽兼養傷，換潘頓冇甩拖，順利打開勝利之門，兼向「金叻星」報番一箭之仇，後駒贏完以同一配搭黎海榮，跑番同一班次及路程卻走晒樣，輸到三甲不入只得第五。「金滙龍華」直路彈甩晒，潘頓早至最後150米已收韁，不斷向後望，似乎自己都唔敢相信座騎咁勁，結果老早收韁下仍勝四身位，認真誇張。
雷神臨尾騎「勝利雄心」上嚟同「金滙龍華」串Q，大冷門「感恩」捱番一席季軍，第四名亦係冷門「神奇飛龍」，四重彩派78,460元。
謝國輝表示賽前已對「金滙龍華」充滿信心，馬兒暫時主攻谷草，稍後時間才去沙田發展。沈集成則大讚潘頓騎得醒目，克服外檔阻力，見慢步速立即把座騎移出外叠，希望評磅員高抬貴手，不要加太多分。