唔少政界中人覺得啲政治助理月薪高達十萬，但又冇乜嘢做咁，八方覺得唔可以一竹篙打一船人，好似環境局政助區詠芷（圖），近期為咗推銷今日開始實施嘅膠袋新徵費，頻頻四出解畫，噚日佢一朝早先去dbc數碼電台接受《早晨八達通》訪問，開咪後趕去now新聞台嘅《時事全方位》節目再聽觀眾意見，賣力度值得一讚。
區詠芷喺dbc面對烽煙聽眾查詢，佢都即時解答到，證明真係有做足功課。佢仲透露去街市買嘢時，會自備乾、濕貨購物袋各一個，用完後仲會洗乾淨，仲喺《時事全方位》節目結束前展示過購物袋，唔知一班政助會唔會仿效區詠芷，多啲喺傳媒前亮相？
李八方
mailto:[email protected]