湖人喺九日內兩次擊敗76人，睇番上月22號主場以101:87贏波嗰場，功臣梗係攻入個人今季新高二十九分嘅林書豪（圖），之後佢仲乘勢連續三場波都拎到雙位數得分，可惜之後受咗傷，周二對76人要繼續倦勤。林書豪今季約滿後繼續留喺湖人機會唔大，有傳𠵱家已經有幾間球會有意斟佢，包括76人在內。
林書豪喺今季由火箭轉投湖人，諗住有機會拍住拜恩大展拳腳，點知拜恩因傷提早收「咧」之餘，佢自己喺陣中亦唔算有太多上陣時間，至今上陣70場比賽只得26場係正選。據講唔少球會都有意喺下季簽林書豪，包括重建中嘅76人；有傳佢主要考慮因素係有正選，所以就算係由一支魚腩轉會去另一支魚腩，但至少個正選位會更加穩陣，對林書豪嚟講亦係唔錯嘅選擇，但要收番今季高達1,400萬美元（約1.1億港元）嘅年薪水平，就難少少嘞。