贏咗場波，輸咗個選秀權？湖人今季戰績仲爛過上季，球迷都希望佢哋放棄今季，成績越差就越大機會抽到個高順位新人選秀權，揀番個優質新血下季重新上路。不過湖人喺周二NBA常規賽作客另一支被指係擺爛嘅球隊76人，「唔小心」加時下贏113:111，隨時捉蟲。
老大哥拜恩（Kobe Bryant）復出冇耐就再受傷收「咧」，湖人今季戰績繼續差勁。周三作客76人賽前，湖人以19勝53負喺30支NBA球隊中排尾四，76人就以18勝56負排低一級；換言之湖人輸波嘅話大家贏波場數就一樣。常規賽最終排名越低，季後可以抽中下季高順位新人選秀權嘅機會就越高（見附表），所以呢場波喺陰謀論角度睇，絕對係「非敗不可之戰（must-lose game）」。
隨時送走選秀權予76人
湖人喺個幾星期前先贏過76人一次，到今場波作客再對壘，雙方一路都打得幾緊湊。完場前17秒，76人嘅路維（Nerlens Noel）兩罰全中將比數領先到102:100；不過湖人班球員似乎「唔記得要輸」，新秀控衞卡拉臣（Jordan Clarkson）最後一擊博到犯規，罰球兩射中晒將比賽帶入加時。去到加時又係卡拉臣發威，完場前上籃絕殺，全場貢獻26分同11次助攻，助湖人以113:111贏波。
可能有球迷會問，相差一兩個排名，最多咪喺選秀抽後一兩位；湖人早年向太陽羅致尼殊，喺呢宗交易將一個2015年選秀權送去太陽，但呢個係屬於受保護前五選秀權（protected top 5 pick），意思係只要湖人今夏可以喺前五順位內揀到新人，就唔使交畀太陽。假設湖人今季最終排尾四，佢哋保到前五揀新人嘅機會係82.8%；如果再低一級，機會率就會增加到96%，有得揀梗係近十成好過得八成啦，更諷刺係太陽已經將𠵱個選秀權送咗畀76人，所以湖人呢場波真係贏得無謂啦。
積遜拍片留球迷
湖人教練史葛賽後話：「我冇關心過季後選秀，喺任何情況下我哋都會努力爭取每一場勝仗。」唔贏都贏咗，唔通又鬧班球員贏咗波慶祝咩。
湖人同76人邊隊排低啲仲有得鍊吓，但講擺爛睇嚟唔夠紐約人嚟。截至周二佢哋以14勝60負喺聯盟包尾，難為總裁積遜日前拍咗段片向持季票球迷保證，今季後已經有明確大計，前景一片光明喎，聽住先喇。
