內地歌唱節目《我是歌手》今個星期五舉行雙年巔峰會，叫埋班第二季同第三季參賽歌手再PK，G.E.M.、張杰都喺名單入面，仲有兩日就錄影，前晚總導演洪濤喺微博發脾氣話：「你不換歌，我們換人！晚安！」有網民就插佢搞宣傳都唔係第一次，同時又有網民爆料話歌手係早前同樣喺《康熙來了》「堅持唱自己新歌」嘅歌手G.E.M.，仲話想喺雙年巔峰會上演唱自己嘅新歌，而湖南衞視就想佢唱一首老歌，兩邊溝通唔掂搞到有啲扯火。另外，最後一集中途退賽嘅孫楠，亦俾湖南衞視正式封殺。
此外，《我是歌手》第三季冠軍韓紅跟陳奕迅合唱《十年》，即係廣東話版嘅《明年今日》，播出後引來極大迴響，更掀起網民罵戰。
網民惡搞韓紅
有人鬧爆韓紅將一首淡然愛情故事嘅歌搞錯晒，係唔係都飆高音，仲用「包租婆腔」糟蹋首歌。班網民又改圖捕捉韓紅嗌歌，Eason好似被嚇親嗰個樣，後面就加咗句對白「睇住呀！」，認真抵死！
撰文：馮仁昭
