今日係愚人節，但我求大俠唔做整蠱專家，意甲AC米蘭真係同紅遍全球嘅Hello Kitty合作，全力進軍女性粉絲市場。AC即刻出動佢哋嘅吉祥物Milanello取代Dear Daniel，以情侶檔姿態同Hello Kitty拍住上，若然加埋AC班主芭芭拉同型佬教練恩沙基真人演繹，咁就完美嘞。
吸納女性觀眾賺番筆
意甲勁旅AC米蘭日前喺官方宣佈有新球員加盟，不過呢個新兵係一隻貓。AC喺球衣贊助商三間牌穿針引線下成功同深受歡迎嘅Hello Kitty達成合作協議，仲即刻推出一個新標誌，Kitty同AC吉祥物Milanello一齊揸住AC個隊徽。呢次合作係想吸納更多年輕粉絲，特別係女性粉絲。AC嘅版權經理保羅卡薩里尼就話：「呢個將女性形象注入男性運動嘅構思實在一流。𠵱家越嚟越多女仔睇波，佢哋亦自然成為我哋嘅目標。由九月開始，一系列同女粉絲有關嘅產品包括衫同埋飾物等，就會同大家見面。」由下個月中起，粉絲會喺聖西路球場見到Kitty嘅蹤影，之後以Kitty為主題嘅AC商品亦會陸續喺意大利同日本推出。
上季收入僅及皇馬一半
據財經權威雜誌《福布斯》透露，AC喺上季嘅收入有2.5億歐元，但比皇馬（5.5億歐元）、曼聯（5.18億歐元）同拜仁（4.88億歐元）等歐洲勁旅，搵少接近一半，所以陣中唔少球員都係借用或免費簽返嚟。
目前AC喺意甲排第八，比第三位嘅拉素少14分，下季應該冇機會踢歐聯掘金；家陣佢哋咁有諗頭玩crossover，無非都係想賺女粉絲嘅錢，增加收入。對於AC呢個計劃，外界反應好壞參半，有球迷覺得好新鮮，但亦有球迷認為會搞到AC不倫不類變到好乸型。查實Hello Kitty喺意大利知名度甚高，之前名牌時裝Anteprima都試過同佢哋crossover出手袋，所以AC今次同Hello Kitty拍住上真係冇得輸。
識睇，一定係睇足英台【英波Live】：
http://soccer.appledaily.com
http://bit.ly/engballlive