「警察拉人、法官放人」，呢句口號喺建制派陣營近期熱爆，無他嘅，正如愛港之聲主席高達斌所言，建制派覺得有公務員偷朱古力要被判監，但示威者偷鐵馬搞衝擊，唔係緩刑就只獲判守行為，梗係覺得唔公平。但有建制派口痕友話，愛字堆高叫呢啲口號就「恰如其分」啫，但堂堂立法會議員都係咁講，就不知司法為何物，有失身份。
到底口痕友口中「有失身份」係邊位？花生友相信大家都估到，係上周喺特首答問大會大大聲講出呢句口號嘅民建聯葛珮帆啦！據知「葛博士」唔只被泛民批評唔尊重法治，就連建制陣營都對佢口出狂言有微言，因為法治呢家嘢，神聖不可侵犯，點可以由立法會議員出聲郁，搞到有藐視法庭之嫌？
花生友聽聞，法律界會繼續就此出擊，逼迫「葛博士」解釋何出此言。禍從口出後，到底點樣拆彈？花生友唔係「葛博士」肚裏條蟲，唔知佢有乜良方妙計，只知律政司高度關注事件，繼前日律政司司長袁國強開腔以及律政司發聲明後，噚日袁國強接受傳媒訪問時再度解畫，先重申佢哋嘅聲明唔係針對任何一個人，繼而指司法獨立好重要，所以法官點樣處理案件都要尊重。雖則佢話喎，唔係唔能夠評論法官判案，但要有限度：「唔希望喺關心或維護法治時，反而做出一啲事情有反效果。」唔知「葛博士」收唔收到？
花生友