警隊舊年為應對佔領運動進行「Operation SOLARPEAK」，唔少警隊官式活動被迫取消或押後，好似每年喺高級警官餐廳舉行嘅「聖誕午宴」都冇咗。根據警隊傳統，警務處處長同副處長會喺「聖誕午宴」親自切火雞畀同事享用，答謝手足過去一年嘅努力。
為咗延續呢個傳統，警務處處長曾偉雄同副處長盧偉聰就喺上月4號舉行嘅「開年盆菜午宴」，親自為96名警務人員同秘書舀湯圓，答謝過去一年嘅辛勞同盡忠職守。曾偉雄查實仲有個幾月退休，而盧偉聰盛傳係下屆熱門一哥繼任人，今次佢哋兩位同場為同事舀湯圓，實在係難得一見嘅場面。
王國興蝦碌挽留
而一哥噚日出席立法會特別財委會時，工聯會王國興大讚佢喺佔領期間喺警察總部「日以繼夜、夜以繼日」指揮，認為適逢政改年，「好戲在後頭」，希望保安局局長黎棟國挽留一哥：「反正𠵱家都講緊延長退休年齡。」財委會主席張宇人就提醒佢，延長退休年齡嘅係保安員，黎棟國則指一哥係公務員，要按既定程序處理有關安排。
李八方
mailto:[email protected]