冇陰功呀，著名法國街頭藝術家Invader喺上環樓梯街嘅作品最近被人鏟走咗！究竟鏟走呢件作品嘅人知唔知道對方係邊位？國際拍賣行佳士得最近將Invader一件名為《別名:香港第59號》嘅作品拍賣，以268萬元成交，佢嘅作品值錢㗎，有藝術價值㗎。
華華舊年行經樓梯街發現Invader呢個女士着住紅色旗袍、頭頂附近有隻細怪獸嘅作品，噚日再經過就發現作品不見了，明顯係被人粗暴鏟走。難怪Invader早前接受訪問時都話「香港係唯一一個鏟走我作品嘅城市」。
Invader於2001年首次來港，至今到訪過5次，喺香港街頭創作過大約75幅作品，可惜幾乎全部被鏟走，好在佢每幅街頭作品都會做一式兩份，今年5月上旬喺中環PMQ就會有佢嘅作品展。