名錶「一哥」百達翡麗（PP）及港女最愛Chanel，先後因滙率問題而在香港減價。路邊社消息話，Chanel減價兩日在香港已做了數千萬元生意；而原本3月是鐘錶零售業淡季，但PP在香港的分銷商，過去一個月銷售卻是record high。
怕蝕底，似乎是人的天性。明明是名牌以往加價太狼死，現在「嘔番畀你」，但都大把客爭住要。海迪認識在投行工作的朋友，他向來是PP忠實擁躉。減價後，每次提起PP總是一臉苦澀。「買多隻溝淡佢？」他立即耍手擰頭。「𠵱家仲買？會俾人笑的。」
「奢侈品」重點在於「奢侈」二字。如果降低門檻，賣濫晒，作為一件名牌仲有咩值得稀罕的地方？名牌減價，短線是可刺激銷情，但長遠而言，真正幫襯你那班core customers，反而有機會離你而去。相信Chanel香港負責人見到分店門外那條長長人龍時，肯定是頭痛多過興奮。
向來堅持名牌一定要夠「罕有」的Hermès，上周公佈業績，再次向大家展示咩叫做「王者」：銷售按年增長10%，幅度是LVMH的一倍；純利率為31%，同期LVMH只有19%。長遠盈利的質素，才是名牌股最值錢的地方。
海迪