吳若希媽咪謝芬芳大前日喺大埔汀角路踩單車時炒車，昏迷送院要開腦做手術，現時仍留喺沙田威爾斯醫院嘅深切治療部（ICU），吳若希堅持如常開工，但每日幾忙都有去醫院探媽咪。
仍然未清醒
噚日下午約五點吳若希又去咗醫院，吳母男友稍後都到咗，仲拎住一盒紙巾同一包成人尿片入病房。吳若希人緣唔錯，蔡思貝同周志文前後腳嚟咗醫院慰問吳母，探完病吳若希接受訪問時話：「媽咪好轉咗好多，佢用咗好多麻醉藥，唔可用清醒形容，醫生話過咗呢兩日水腫期，就可離開ICU。」吳若希指胞弟好堅強：「細佬平時只係掛住打機，呢幾日都幫手執嘢，佢獨立咗。」
溫家偉患難見真情，問到係咪戀情浮面，吳若希話：「我哋真係唔係拍拖，只係好朋友，細佬當佢係大哥哥，唔好累到佢。」至於吳被影到日前夜訪富商十哥林棣權寓所，吳若希話同佢識咗就嚟九年，直認吳母入院十哥都有主動關心，咁有發展機會嗎？吳若希話：「我唔覺我哋關係有乜改變。」
撰文：馮仁昭
