港交所（388）行政總裁李小加舊年促成滬港通，令到唔少人對佢加晒分，就連一直同佢唔多啱嘴形嘅立法會金融服務界議員張華峰，噚日都話李小加過去幾年「交到功課」。
話雖如此，張議員依然不滿意李小加過去只係大力支持大型基金，幫大型基金、外資行搵多好多生意，直指李小加「對中小型券商缺乏愛心」。咁啱中資券商組織下月中會約埋張議員與李小加食晏，李小加𠵱家聽到張議員咁講，到時記得拎出愛心喇。
其實市場一般估計李小加會續約做多3年，事關佢啱啱促成滬港通，𠵱家大家等緊深港通，港交所董事會或者政府應該都想佢做多幾年。
佢2009年10月加盟港交所，2012年續約一次，今年10月約滿。早排佢都話對目前工作好滿意，似係會續約。