上星期五中證監突然公佈，畀冇QDII資格嘅公募基金，透過港股通買股票。呢個消息一出，真係令全城O嘴。唔係佢講，真係唔知原來港股通係有呢個限制囉，難怪滬港通開波咁耐，港股通就拍烏蠅拍足咁耐。點解咁重要嘅資訊，有關部門可以低調處理？
點都好，而家真正落實港股通，噚日港股通全日消耗25.59億元額度，創新高，證明內地真係有資金係想透過呢個渠道買港股。港股正式迎接同A股真齊炒起嘅時代，噚日大市雞犬皆升，後市應該都仲可以玩多一排。如果買港股通名單股份，當然以炒AH折讓為首，另外要炒有一帶一路、自貿區概念股，首選係一批A股冇但H股有嘅股份。
股份推介方面，今日揀西部水泥（2233），首先係一帶一路之下，中國加大基建投資，水泥業當然受惠。咁識揀一定揀最近工程項目嘅公司，好似專做西北地區，鄰近絲綢之路區域生意嘅西部水泥。咁你可能會話，產能過剩未解決。冇錯，正正因為有一帶一路，面對龐大需求，產能仲可以過剩得去邊？
睇埋圖，股價破咗4月的阻力經整固後，噚日創超過一年高位，最高見1.18元，氣勢如虹，再加上而家大市氣氛咁熱烈，點睇都仲有得繼續炒，股價一路向北！
Fifi
http://www.facebook.com/lovefrystock
本欄逢周二、四刊出