騎師未盡全力被重罰，一般來講馬迷都冇乜異議，好似巫斯義策「精彩鬥士」一案，隻馬沿途墮後，佢究竟有冇心搏殺，大家都心中有數。
不過騎師喪放座騎輸咗，被指犯規重罰收場，係咪合理就見仁見智。早幾年蔡明紹騎「威力高」喪放要停賽九個賽日，今季亦有呂卓賢策「一馬當先」類似情況須停賽八日，大家有冇想過，如果兩隻馬最終放到，騎師肯定唔會受罰外，更一定有人讚佢哋騎得好。
好似2010年3月滇仔騎「引伸波幅」正係喪放照贏，本月中吳嘉晉策「有醒」，早段亦係快到甩轆帶到，試問「引伸波幅」、「有醒」如果唔生性末段潰散，鞍上人就可能招來重罰橫禍，所以喪放唔一定係亂跑，只不過成王敗寇而已，亦令人思考，喪放輸咗就重罰騎師，係咪對佢哋唔公平！
其中「有醒」今期又再上陣，路程、配搭不變，會否再喪放就唔知啦，但就算吳嘉晉今勻喪放慘敗，因為有上仗放到前科關係，競賽小組一定唔會搵佢麻煩，豈非就是傳說中的免死金牌？