身邊好多「辦公室廚神」，鍾意自己煮幾味，阿貴瘋狂煮溫泉蛋，小魚就鍾意阿茂整餅（其實係麵包）。呢排大家冇煲劇就狂煲「黑啤雞肉飯」（圖）。
#啤酒令肉變鬆軟
日本網站《beable》最近發佈咗一條懶人食譜短片，喺電飯煲放啲白米，之後倒一小碟去殼枝豆，然後鋪上幾片雞肉，再加少少雞粉、鹽，之後就係主角之一黑啤，成罐倒落去（因為啤酒有泡，所以要分幾次慢慢倒，以免漏出嚟）。飯煲㩒掣等熟就食得。片中兩個毒男食完一臉滿足。段片瘋傳後好多人跟住嚟做，都留言話好味，「有陣陣麥香味，唔知點解仲有豉油味㖭」。
成罐啤酒，煮醉雞咩，食咗會唔會醉㗎？名廚Jacky Yu就話，煮飯時嘅熱力會揮發大部份酒精，所以只會剩低小麥嘅香味；佢話自己都有用啤酒煮餸，例如蝦、蟹及雞肉，「啤酒嘅泡泡會令肉嘅纖維變得好鬆軟㗎」。
網友都有修訂菜譜，例如用鮮雞肉，咁就唔使雞粉都好有雞味；又有人話用小麥汁代替啤酒，咁就小朋友都啱。有同事叫許小姐喺公司試煲，但阿貴叫停：「唔好呀，佢煮貢丸都會煮到變臭㗎」。
費清 ＃要生計，也要生活 ＃毋忘初衷