郭能同薛寶力兩位洋將今期都係停賽復出，跑完前六場，大家都有P冇W，但郭能第七場三班1400米發威，爆冷贏「好愉快」，打響復出頭炮，兼幫呢匹苗廐南非馬取得在港首捷。苗禮德同大摩昨晚(29日)先後敗走杜拜，呢日分別贏「好愉快」同「君悅灣」補數，攜手包辦第六口孖寶，算係攞番份安慰獎。
「好愉快」馬主係好愉快團體，成員包括寢具雅芳婷老闆許章榮，聘用佘詩曼為代言人多年，此馬上仗用田泰安靠放輸唔遠得殿軍，呢次田泰安停賽，益咗剛啱刑滿之郭能，結果以個半身位輕取對手，爆出20倍冷win，至於落飛馬「歡樂小子」臨時由楊明綸換蘇狄雄，後上同羅理雅座騎「車神」影相分名次，最終甄子丹老襟汪圓圓老公蔡加讚愛駒「車神」得第二，「歡樂小子」只跑第三，第四名乃另一落飛馬「金碧陽光」，四重彩派174,058元。
此場5號「包勝」搭14號「歡樂小子」連贏位曾受巨額過關影響，一度只得3.3倍，比位置Q仲要熱，結果前駒在雷神胯下冇影，獨贏1.6倍馬三甲不入，巨額過關就此付諸流水。