台灣輸入日本「核輻射禁區」食品，引起朋友間一番討論，原來朋友分開兩派，一派認為日本仍有核輻射，三年前發生311事件後，至今未踏足日本，又講到有兩位孕婦去完東京之後，返到香港就發覺嬰兒有異，遵醫生吩咐，合法流產，真係聽見都驚。
另一派則有理冇理，去日本行街購物是硬道理，電台B上星期先至去完東京返來，問佢驚唔驚，佢就話：「驚就同一億幾日本人一齊驚！」記者小G亦然，就快全家上中下三代第N次去日本旅行，完全當輻射冇到。睇數字，好多人係唔驚嘅，強國人就夠逼爆東瀛啦，因遊客太多，東京酒店房間雖多，冇預早計劃就一房難求。地產W去加拿大，在東京轉機，於是索性計劃逗留兩日，吃喝一番先至上機去溫哥華，點知冇一間旅行社話可以代佢訂到房，佢最後想起肥仔K，搵肥仔K搜尋東京酒店房間，最緊要係接近地鐵站、肥仔K話上日本酒店網，英文網就係咁意，好多資料欠奉，但上日文網，就有成籮資訊，好快就代佢搵到一間適合嘅酒店，但麻煩係再要打電話（Skype）去「再確認」，唔識日文就休想傾得掂，聽得明。一般日本職員，懶學英語，話知你全球化係咁噏吖。
左丁山都好耐冇去東京大阪咯，搵肥仔K夾時間好麻煩，但試過同佢一齊去，有佢講日文，覺得真係過癮，在北海道深山都可以搵到好舒服嘅平價溫泉浴，唔駛一千日圓，自己去就語言不通，雞同鴨講，同樣價錢，得到嘅服務差好遠。
自己就鍾意去曼谷，前星期六至在Zanotti嘆意大利菜，真係一樂也，行Central Chidlom百貨公司，面積大，遊客不多，貨式齊，又係好爽，適逢泰銖貶值，每元（港幣）可兌換4.19泰銖，抵到爛！但不可不知的是，在機場K Bank兌換，絕對唔抵，美元兌30.92，港元兌3.73元，換算之下，美元兌港紙係8.55，簡值食人車馬炮。左丁山梗係唔制啦，出咗機場，搵時間去一間Super Rich找換店（由四面佛過馬路行去水門區，一條直路約行十分鐘，轉右入一條橫街就會搵到），美元兌32.07，港元兌4.19，換算美元兌港紙係7.75，係香港市場匯率，好公道，而4.19係比3.73高出百分之十二咁多，各位老友去曼谷旅行，有時間嘅話，都唔好在機場兌換泰銖呀！