雷神遠征敗走杜拜，一返嚟香港，第二場即贏吳廐「富國強駒」，至於潘頓因今日喺日本出賽策「友瑩格」，故同日沙田日馬跑唔到，頭馬損失自然在所難免。第三場四班千二米，原本佢幫沈廐「永旺年年」做好工夫，試閘一放絕塵，卒之冇得騎益咗楊明綸。
三歲澳洲自購新馬「永旺年年」，與馬王「威爾頓」同父，果然不辱家聲，初出貼欄一放到底，前速較「星運俊爵」更快，在楊明綸胯下順利打響服役頭炮，5.1倍大勝四身位之多，資深女馬主張佩珠養過「永旺駒」、「永旺財」等駒，歷年養馬累積贏到第11win，成績理想。
沈集成賽後強調，雖然騎師潘頓早前曾策騎「永旺年年」試閘，但當時只希望由他試後，向他查詢意見，即使他今日不用前往日本出賽，亦未必一定交由他主轡。反而馬主向他表示，只要楊明綸多在晨課親操，便交由他策騎出賽，如今由他贏馬，實在相當圓滿。他又謂「永旺年年」 腳法甚靚，初出即能贏馬，估計質素甚高，全熟後長力可扳至1400米。
華倉呢日早段枕住有貨交，繼頭場由葉楚航同徐雨石包Q後，今場又開華倉連贏，事關文家良訓練之「鑽飾傳奇」又再跑第二，熱Q齊頭派80蚊，三、四名分別係「星運俊爵」同大熱門「駕悅」，四重彩派三千五百幾。