唔知大家有冇留意呢，喺一輪大鑼大鼓之後，由特首夫人梁唐青儀任總司令嘅「香港青少年軍」喺成立典禮後竟然冇晒下文。先聲奪人之後卻歸於平淡，有民主派諸事精話事件並唔尋常，唔知同佢最近聽到嘅消息，有冇關呢？
到底呢位諸事精聽到啲乜嘢咁巴閉？佢話喎，早前同一個來自內地嘅收風人見過面，席間本來都係提政改、甚至連白鴿黨何俊仁辭職公投成唔成事都傾埋，點知傾完呢啲，佢突然被問到，點睇青少年軍事件？既然有人咁樣問起，呢位諸事精就話同對方打開天窗說亮話，提及喺香港政改年，呢啲敏感嘅嘢，中央唔搞好過搞啦，貪香港人對中共唔夠反感咩。
點知佢話講完呢番話，對方非常認同，仲表現出一副委屈相，繼而就話喎，其實壇嘢同中央解放軍無關，都係民間組織啫，估唔到咁大爭議，仲反過來講，事件至少有幾大處理不當，第一係成立典禮點解要喺軍營搞、唔可以喺其他禮堂或運動場舉行？其次係典禮為乜神神秘秘，唔俾所有傳媒採訪，搞到國家好似有秘密任務畀佢哋咁。
諸事友反問，如果唔係駐軍要搞，點解駐軍司令譚本宏有份任贊助人？中間人堅稱呢啲只係虛名，大家太敏感。諸事友同花生友一樣，聽完都唔多信，只相信特區正值多事之秋，斷估中央都唔想青少年軍再搞啲杰作為政改「贈興」。
花生友