立法會部份議員以拉布力阻創新及科技局上馬，令到盛傳會出任創科局局長嘅理大前副校長楊偉雄，一直得個等字，結果特首梁振英特別為佢度身訂做創新及科技顧問職位「做住先」，佢噚日就以呢個身份出席「香港青少年科技創新大賽」，致辭時話政府要有新思維、更敏捷地推動創新科技發展，講講吓仲以當年喺美國同蘋果教主喬布斯嘅一面之緣，勉勵得獎學生。
楊偉雄話1977年4月17日係佢第一次見到喬布斯，當時喺美國三藩市西岸電腦展，「佢當時成功說服我買價值700美元嘅Apple II」，佢話當時教主已賣出超過一千台Apple II，點知呢批機卻因為散熱有問題，要更換塑膠外殼，對於教主嚟講梗係好大挫折，但係楊偉雄相信，正因為蘋果肯克服呢個問題，仲升級到Apple IIe，成為當時最暢銷嘅個人電腦，借此叫學生遇到問題都唔好放棄。
李八方
mailto:[email protected]