加里夫巴利上周六幫威爾斯喺歐國盃外圍賽B組，作客以色列梅開二度，帶領球隊以3:0大勝，升上小組榜首（見附表），賽後仲喺Facebook分享佢同隊友喺更衣室慶祝張相，笑得不知幾燦爛！我求大俠都戥佢開心，呢個先係我哋熟識嘅「齊天大聖」吖嘛！
威爾斯喺今屆歐國外頭四輪未嘗一敗，上周六作客暫列榜首嘅以色列，竟然談笑用兵下炒對方三蛋。艾朗藍斯喺上半場補時頭槌先開紀錄，助攻嘅就係巴利；巴利換邊後就唔再為他人作嫁衣裳，將球場變成自己舞台，喺五十分鐘先射入靚罰球；七十七分鐘藍斯投桃報李，巴利禁區內撞射得手，仲壓倒名宿魯殊成為威爾斯喺歐國外入波最多嘅球員；而巴利入波後對住個天咆哮慶祝，俾傳媒大造文章，話佢係想向近期勁踩佢嘅皇馬球迷還擊。
巴利賽後上載咗佢同隊友喺更衣室慶祝張相，好多粉絲留言力撐，不忿佢最近喺皇馬受氣，叫佢返英超搵食；而佢賽後接受訪問嗰陣似乎啖氣仲未消，話唔需要回應喺皇馬所受嘅批評，最緊要做好自己。
咆哮還擊皇馬躉噓聲
巴利上季以一億歐元加盟皇馬，即幫球會重奪歐聯，但今季先傳佢因太獨食，惹來C朗等隊友不滿，喺更衣室內受排擠，之後皇馬喺二○一五年又諸事不順，西甲榜首位置更被巴塞取代，呢位今季入球率低迷嘅威爾斯人慘成箭靶。上周喺西班牙國家打吡輸畀巴塞後，佢揸車離開球場時，俾兩個球迷追住拍打同飛踢佢架白色賓利，搞到今夏走人嘅傳聞越吹越勁。
威爾斯五戰三勝二和積十一分，升上榜首，睇嚟巴利好有機會首次喺國家隊嘅大賽舞台上獻技。
識睇，一定係睇足英台【英波Live】：
http://soccer.appledaily.com
http://bit.ly/engballlive