估唔到中聯辦主任張曉明都咁捧「香港藝術節」場。有讀者同八方講，上周四去文化中心大劇院觀賞莫斯科大劇院芭蕾舞團演出嘅《巴黎火焰》時巧遇張曉明，當時小明身邊冇乜隨從、有幾位女士陪伴在側，並坐喺全場最正中嘅靚位。
呢齣吸引小明捧場嘅《巴黎火焰》，喺1932年由伐伊諾能原創、以法國大革命為故事背景，據知係前蘇聯獨裁統治者史太林最愛嘅芭蕾舞劇，而今次藝術節呈獻嘅則係由前任舞團藝術總監羅曼斯基改編嘅版本，除咗保留革命激情同抗爭場面，仲重點描述兩對年青愛侶因為階級差異而產生嘅愛情悲劇。呢位讀者話小明全程坐到足，應該睇得好投入；同場仲見到公民黨梁家傑㗎，但佢兩位中場休息喺場外等候時，企得好近卻視而不見。
李八方
mailto:[email protected]