大摩做得盃王，當然連三級賽都唔放過，更何況剛周六晚於杜拜派馬王「威爾頓」跑大賽大熱倒灶梗頸四咁失威，結果呢日佢先於第六場贏「君悅灣」普通四班賽，第九場更憑雷神操刀之「活力歡騰」擸埋1800米三級賽精英碟起孖，目前有41win，趕過40win原本排第一之方嘉柏，登上榜首位置，一吐敗走杜拜美丹馬場烏氣。
大摩前年憑「軍事出擊」首勝精英碟，今年靠雷神重奪錦標，後者則係第一次贏此賽。
講番「活力歡騰」，1月28日勝後尿液被驗出含違禁物質，10日前本月19日作出裁決，被取消頭馬資格，騎練、馬房員工及馬主周祈銳，要嘔番合共855,000元獎金出嚟；呢日贏精英碟，頭馬獎金有1,567,500元，夠補數有餘，五歲馬累積五捷，兼首度勝出分級賽，大摩幫馬主順番條氣。
沈廐「好靚仔」上屆精英碟用楊明綸大熱第二，今屆配何澤堯變冷門都係第二，連贏搭「活力歡騰」派1,093.5元，前駒季內跑來跑去仲未開到齋，第三名係由楊明綸臨場換黎海榮之「包裝鬥士」，跑第四係另一匹摩廐馬「駿馬名駒」，澳洲新秀連達文首日客串，呢個係佢最佳名次，四重彩派242,037元。