「60」呢個數字，係上周六兩個NBA新紀錄嘅關鍵。不過，西岸作客破紀錄嗰隊開創光輝新歲月，東岸嗰隊就係改寫恥辱黑歷史。勇士以108:95輕取公鹿，今季常規賽累積隊史最佳嘅六十勝，提早鎖定西岸常規賽一哥之位。至於曾經喺東岸叱咤一時嘅紐約人，就俾公牛大炒111:80，錄得隊史最差嘅單季六十場敗仗，繼續穩守聯盟包尾。
勇士已經晨早攞到季後賽入場券，個太平洋分區冠軍亦都到手；但班球員勇起上嚟真係勒唔住。雖然今場收起咗最佳防守球員熱門之一嘅祖蒙特格連（Draymond Green），但係「浪花兄弟」出馬已經夠殺。全場貢獻廿五分同六次助攻嘅史堤芬居里（Stephen Curry），輕鬆射入六個三分波，而交出廿一分嘅K湯遜（Klay Thompson）就入咗三球；公鹿全隊加埋都係入咗兩球三分咁大把咋。
勇士已破隊史紀錄
勇士打咗七十三場波贏到六十場，已經打破球隊史上單季勝仗紀錄，睇個勢相信呢個紀錄可以不斷刷新㖭。而歷嚟只有十二隊可以做到呢個成績，其中九隊最終打到入總決賽，全部順利封王；唔知勇士今年會唔會成為第十隊呢。
嗰邊廂，兩位星級後場球員帶領嘅聯盟新貴勇士越戰越勇；呢邊廂，老牌勁旅紐約人就越打越頹，又大敗一場之後今季已經輸夠六十場，打破球隊歷嚟最差成績。不過，睇吓佢哋今場嘅統計，○六年嘅「水貨狀元」巴蘭尼（Andrea Bargnani）交出十四分同七個籃板，已經係全隊最靚仔嘅數據……紐約人想唔輸都幾難啦。
