於七、八十年代曾紅爆亞洲嘅日本男歌手西城秀樹，下個月13日就滿60歲，佢將會喺呢個特別日子推出紀念大碟《心響》，入面嘅新曲《海市蜃樓》同佢一啲經典歌曲包括《傷痕纍纍的Laura》等，都重新錄音，但佢要錄足一年先至完成，因為西城要克服曾經中兩次風嘅障礙，真係令人佩服。
西城秀樹喺2003年6月中風，克服種種困難後，不幸再於2011年12月第二度中風，𠵱家佢右腳右手仍然唔能夠活動自如，仲有麻痹情況，但西城一面接受治療、一面繼續唱歌。不過，佢錄新碟都唔係咁順利，因為要同後遺症角力，有時去到錄音室狀態唔好就完全錄唔到。今次西城仲拍咗三個封面，都仲幾有型。
撰文：太空漿