梁振英於三月二十六日出席立法會答問大會，因在三月二十五日曾在瑞信銀行投資論壇回答蘇澤光的提問，講了一句vote them out（即是用選票趕走在立法會拉布阻住地球轉的泛民議員），引起泛民議員反彈，不少人預料在立法會答問大會必受泛民議員責難，雙方應會唇槍舌劍，好戲連場。左丁山卻預先對朋友話：「大概唔會好激烈，因為照以往經驗，陳偉業、陳志全、梁國雄等人都會準時收工，到十一時左右便會擲嘢，被曾鈺成趕離會場。」劇情果然係咁，到咗十時四十分左右，陳陳梁三人一齊高叫口號，擲紙仔，立即俾曾鈺成趕走，三人準時收工。做議員可以有激烈反對行動，但多次主動出擊，博被趕，是否一個負責任議員所為？選佢地入立法會，唔係要睇佢地表演亂擲紙仔，而係想佢地代民發言，同特首或高官辯論，暴露官僚辦事無能或不公平也。成日都係咁，做膚淺騷，陳陳梁真係想選民vote them out？
梁振英講呢句，當然並非原創，美國左派（自由派）思想家、語言學家，MIT榮休教授Noam Chomsky在1970年2月14日演講：Government in the Future，內有一句，Unfortunately, you can't vote the rascals out, because you never voted them in, in the first place。Rascals即是壞蛋，梁振英知道講vote them out會一定激嬲泛民，邊度敢用rascals呢個字吖，講出嚟，就真係唔止撩交嗌，而係撩交打咯。
講Chomsky呢位語言學大師，未免陳義過高，但現任理工大學教師黃碧雲在語言方面，確有修正、補習之必要。佢在答問大會質詢梁振英之時，問題有備而來（注意到佢一路講一路睇手機，講詞顯然係寫好在手機內），算係巴辣，可惜呢，身為女教師，佢竟然用「同你片一鑊」咁粗俗嘅語言，令人難過，左丁山讀中學時，夠膽講「片一鑊」嘅話，一定被中文老師罰企，此乃黑社會用語，而且「鑊鑊聲」，係對女士極粗鄙之字，絕對不應出自有教養女士之口，何況係大學女教師在立法會發言？簡直係學生壞榜樣，雖云今日好多揚眉女子，豪邁不凡，但在議事堂上，可以唔尊重特首為人，仍要尊重立法會呢個institution！