如果近幾日經過港島區鬧市，你一定撞到大量怪人，通常都係鬼佬鬼婆着到鬼五馬六，仲要揸住啤酒嘅。冇錯，佢哋都係香港大球場Hong Kong Sevens欖球賽嘅「走犯」。唔到你唔信，個天好似都幫手，早幾日仲陰寒有雨，一開波就陽光普照，印象中好多年都係咁。
點解我會留意？純粹因為「睇肉角度」，天氣好，女球迷自然着得少。好多謝本報體育版記者王子俊與謝榮耀，佢哋揀女球迷影相非常專業，有竹昇妹着制服，又有性感女戰士，連修女都有！相信兩位仲影低唔少好嘢，麻煩今日盡量多放閃卡益街坊。認真問，出年編輯可以班張記者證過我，等我攞正牌撩女仔？
一票難求，中環友一定明白，尤其你做投資銀行，公司係長期有大球場包廂，仲有open bar任飲。但這些機會永遠不是屬於你的，因為公司最高層班鬼佬banker已經霸晒；然後又好奇怪地，其他地區嘅高層呢個禮拜又專登飛嚟香港開會，實則睇波。聰明嘅秘書又一定block晒老闆上周五嘅期，等佢食完晏可以即時閃去球場飲酒。當然，聽日星期一係例牌冇會開嘅。如果你每年都有計班到幾張貴過機票嘅三日通行證，公司班鬼一定同你friend。
比賽到今日，焦點當然係香港隊，同埋最強嘅斐濟、新西蘭。你留意吓，有外籍球迷戴黃絲開黃遮入場（警察今次唔拉），提醒大家半年前那一場街頭運動。
梁栢堅
填詞人+彩池人