各位花生友，一場花生指數爆燈嘅「隻揪戰」就嚟上演。「熱血公民」黃洋達同「忠義民團」阿Man兩位騷王，簽定意向書，決定九月前按綜合格鬥（MMA）規則上擂台隻揪，作為挑戰者嘅阿Man要畀廿萬做賽事按金，雙方同意扣除成本後，收入捐作慈善。唔少花生友噚日開盤，皇上V.S.阿Man，邊位花生指數犀利啲？
擂台未上水已抽。皇上噚日趁阿Man帶隊踩上熱血時報九龍灣嘅總部，全程喺熱血公民facebook網上直播，結果竟然有成三萬幾點擊率，加上以往抽水往績，唔使打，都知道「吸濕力」方面，皇上勝過曾經喺佔領期間、以「綠色和諧大聯盟」成員身份企跳過嘅阿Man一啲啲啦。
又唔知點解喎，阿Man噚日堅拒提供中文名，只肯自稱「Man Shek」，據知阿Man仲一度建議四月喺修頓球場一場現成拳賽即時對決，結果俾皇上聲大大否決。以口水練成嘅「爆咪力」呢家嘢，阿Man真係拍馬追唔上。
兩人噚日即場過磅，結果阿Man重一百七十七點六磅，比皇上嘅一百六十六點八磅重逾十磅，由於意向書規定，限磅範圍係一百六十七至一百七十二磅，即係皇上須增一磅，阿Man則要減近五磅，雙方磅數相近下，唔少人睇好阿Man戰鬥力強啲，話晒試過拆除佔中路障，「除障力」肯定可以掃低把口最強嘅皇上。之但係大家又唔好輕視皇上嘅「快閃力」喎，好似早前「光復元朗」，熱狗因為嗌咗幾句口號就快閃成焦點，八方相信阿Man想掃低佢之時，皇上都會咁。其實講到尾為乜要打交？咪就係為咗香港呢個家更好啫，所以講到「愛港力」，八方都好難為佢哋分高下，但阿Man始終有維穩大軍支持，仍技勝一籌嘅。
李八方