「歡迎收睇上星期五晚嘅溫布萊球場天氣報告！朗尼、韋碧克同史達寧三股颱風已經先後吹襲立陶宛，造成嚴重破壞。最新消息，朗尼已經消散，但一股颶風卡尼已經形成，請立陶宛做好防風措……噢！只係七十九秒，卡尼已經登陸立陶宛。」我求大俠扮完天氣女郎之後，講番正經嘢，外號「颶風」嘅哈利卡尼喺上周五場歐國外後備入替，首次幫英格蘭上陣，佢嘅處子入波亦好似風咁快嚟到，入場七十九秒就攻破立陶宛，幫英軍主場以4:0大炒對手。
後備入替獲鶴臣大讚
因為卡尼嘅英文名Harry Kane同颶風嘅英文hurricane嘅串法同讀音都有啲似，所以英國球迷一早就同卡尼改咗颶風呢個花名。卡尼今季吹襲英超，殺低唔少球隊，仲終於入選國家隊。雖然賽前有傳卡尼會拍住朗尼打正選，但最後都係先做後備，由韋碧克、朗尼同史達寧攻堅。立陶宛實力真係差好遠，朗尼七分鐘就頭槌補中開紀錄。完半場前，韋碧克整多球。五十八分鐘，史達寧接應朗尼傳中射成3:0。
七十一分鐘，隊長朗尼功成身退，千呼萬喚嘅卡尼終於入場。佢第一次掂波係喺中場心口控波，第二次就係傳波畀隊友，第三次發生咩事？咪係佢入場後嘅七十九秒，接應史達寧傳中，喺尾柱頭槌頂入首個國家隊入波囉，就連老大哥朗尼都睇到拍晒手掌，幫英格蘭贏到4:0完場。英格蘭喺歐國外E組五戰全勝，以十五分排榜首。朗尼賽後戥卡尼高興，「國家隊比賽係另一個世界，但佢用咗八十秒左右就入到波，真係難以置信！我哋全隊都為卡尼高興，希望呢球只係一個開始。」鶴臣亦大讚卡尼走去後柱接應嘅意識非常好，好滿意呢場嘅賽果。
哈利卡尼：夢想成真
卡尼賽後喺twitter留言：「係我人生中最美妙嘅一晚！好開心可以第一次幫國家隊比賽，仲入到波㖭，我已經幻想咗呢個畫面好多年！」再美妙嘅事話唔定會喺禮拜二出現，英格蘭後日友賽意大利，因為史達寧提早退隊，韋碧克亦受膝傷困擾（見附表），唔會對意大利，所以卡尼有機會首次打正選。另外，占士米拿同巴尼斯亦唔會喺後日披甲，鶴臣就補選咗修咸頓左閘賴恩貝特蘭。雖然史達寧傷傷哋，但應該趕得切嚟緊星期六利物浦作客阿仙奴場英超上陣。
識睇，一定係睇足英台【英波Live】：
http://soccer.appledaily.com
http://bit.ly/engballlive