F1馬來西亞站噚日舉行咗排位賽，喺狂風暴雨兼行雷閃電下好彩無發生意外。不過，今站可以健健康康出賽嘅艾朗素，噚日造出嘅時間排第十八，睇怕要包尾起步。至於前列戰果都幾令人意外，法拉利嘅維特爾「攝」到上第二名，繼上年後又一次喺呢站斷平治包Q！（now670台今日2:30pm直播正賽）
艾朗素墊底依然正能量
今站係萬眾期待嘅艾朗素復出第一擊，可惜揸住架差對手九條街嘅麥拿侖，僅僅快過違規嘅瑪魯西亞，同隊友畢頓齊齊喺Q1出局，今日只可以由第十八位開跑。之但係經歷過因腦震盪而短暫失憶嘅艾朗素，賽後依然充滿正能量：「喺速度上我哋依然遇到困難，但係已經比之前快好多；我諗我好快就唔使再喺Q1完咗就即刻要接受訪問（意思即係可以晉身之後嘅Q2或Q3）。」
三月舉行嘅大馬站經常落雨，噚日排位賽到咗Q2就落大雨兼閃電嘞；喺練習賽表現唔錯嘅法拉利車手拉高倫，就因為車隊人員遲咗放佢落場，趕唔切造出較快嘅時間，只得第十一。Q3就因為積水延遲成半個鐘先開始，不嬲擅打雨戰嘅咸姆頓有驚無險攞到頭位起步資格，但佢同羅斯保今次就唔可以為平治包Q，俾維特爾攝咗架法拉利入去搶到第二。雖然今季法拉利都仲落後平治一段距離，但維特爾話如果聽日又落雨，話唔定可以攪吓局㗎。